Айдунбегу Камилову - 75 лет.

Мариф Кадимов -> Всем
Айдунбегу Камилову - 75 лет.
Айдунбег Камилован  яратмишунриз талукь мярекатда зи выступление.

ФОТОРЕПОРТАЖ

Гьуьрметлу дустар! Алай девирдин илимди гьар гьи инсандикай рахайт1ани адан 4 жуьредин игьтияжвилин (потребность) шарт1ар фикирдиз гъизва: 1йди адан т1уьн-хун, алук1ун,..са гафуналди адаз (инсандиз) материально-экономический жигьетдай килигун, 2й шарт1уни – адахъ муькуь инсанрихъ галаз рафтарвал авунин гьи дережадин игьтияжвал ават1а къалурзава (эмоции), 3- 4лагьай шарт1ар - инсан дуьньяда авай вири зат1арив гекъигайла тафаватлу тирди  къалурзавай шарт1ар я: 3й шарт1 – има инсандивай фикир ийиз хьун я (мышление), 4й лагьайди инсанди вич дуьньядилай фейила амукьзавай несилриз вуч таз алакьнат1а гьам я (наследие)…
4 лагьай шарт1 – им лап кьакьан дережадин шарт1 я. Са бязи инсанри тазвай шеэъерин мана са вичин аялриз, хтулриз бес жедач (к1вал, пул,…), муькуь инсанри тазвай шеъеринни крарин метлеб халкь патал, къвезвай несилар патал акьван екеди жеда хьи, абурухъ галаз таниш хьайи инсанрин уьмуьр бегьем са сувариз элкъведа.  Гьа и жигьетдай, чи Айдунбег стхади, вичиз яшар гзаф хьаначт1ани, чаз, къвезвай несилриз тур культурадин эсеррин кьадар пара гзаф тушт1ани, абурун къимет гьакьван еке я!
Ингье, за квез са мисал гъида. Идакай за инлай виликни кихьейди тир.  
1970-71 лагьай йисара зун Чепер хуьруьн СШ - дин 10 классдин ученик  тир. Хуьре гьеле телевизорри кIвалахзавачир. Вири кIвалера авайди радиояр тир. Чна Махачкъаладай гузвай лезги передачаярни концертар садрани рикIелай ракъурзавачир, вахт – вахтунда яб акалзавай. Ингье са передачади заз авур таъсир къени зи рикIелай алатзавач…
Ам тухузвайди, куьн гъавурда акьурвал,  чи ширин сес авай бажарагълу манидар, артист, шаир,… Айдунбег Камилов тир. Вични чи машгьур шаир Хуьруьг Тагьиран яратмишунриз бахшнавайди тир. Передача патал хкянавай музыка, манияр ва  чIалар акьван сад садав кьадайбур тир хьи, на лугьуда ибур гьар сад яна цIалцIамарнавай алмасдин къванцин са чин я! Заз и мукьвара Камран стхади а передачадин запись акуна рахкурна. А передачадин автор, мад са бажарагълу лезги, чи дамах Асеф Мегьман яз хьана. Якъин я, бажарагълу инсанрин къуватар сад садав кьадайвал агатайла, арадал къведайдини культурадин акьалтай гуьзел эсер я!
А передачадиз чара авунвай 50 декьикьада вилерикай тайин са девир, са уьмуьр хкатна. Ихьтин передачайри гьар са инсандив, гьар са лезгидив, вич тарихдин дерин къатарай къвезвай са бегьем кьадар - кьисметдиз лап рикIивай талукьвал авай инсан тирди, гьисс ийиз тада. За и передачадиз яб акалайла, зи лезги халкь патал зи дамахдин кьадар генани гзаф хьана. За ахьтин, инсандин рик1 къудгъундай культурадин эсерриз руьгьдин сувар лугьуда. Эхь, гьа и передача зи руьгьдин сувариз элкъвена! Къенин юкъузни ам рикIел хтайла зи япара Айдунбег Камилован гуьзел сесинал лугьузвай  манияр гьатзава, вилерикайни балкIандал эцигна дагъдин хуьруьн рекьерай тухузвай харадин либас алукIнавай цIийи свас, рикI гъаргъардал алай чам,  мехъера зуьрне – далдамдал  кьуьлзавай лезгияр - дагъвияр карагзава!
Айдунбег стхадивай вичин са акьван яргъи тушир уьмуьрдин медлеблувал чи халкь патал лап кьакьан дережадиз хкажиз хьана. Адан т1вар Тагьир бубадин, Асеф халудин т1варарихъ галаз санал чи культурадин тарихда къизилдин гьарфаралди гьатнава.
*
 
*