Селим т1вар-ван авай уст1ар - прораб я. Ам к1валер эцигдайла герек къведай гьар жуьре материалрин хъсан-писвиликай, к1валин къенепата ва хъецелай авуна к1андай к1валахрикай, къиметрин багьа-ужузвилерикай, шегьерда авай гзаф уст1аррин устадвилин дережайрикай, са гафуналди, вири крарикай хабар авай кас я. Адан къвалав к1валер эцигиз куьмек к1андай гзаф инсанар къведа. Ахьтин дуьшуьшар жеда хьи, са бязибуру, Селиман гъиле авай к1валах куьтягь жедалди, сад-кьве варз гуьзетни ийида. Мадни лагьайт1а, Селим, дуьз ацукьун-къарагъун, къуни-къуншийрин, ярар- дустарин ва маса чир - хчиррин арада еке гьуьрмет авай кас я.
Са зур йисан вилик Селиман патав, багьа иномаркада аваз, ухшардиз вичелай яшдиз са кьас т1имил тир, итим атана. «Вичин т1вар Рабадан я» - лагьана таниш хьана.Ахпа вичин дердиникай хабар гана. Вичиз шегьердин Кяхулай т1вар алай поселокда к1вал эцигиз к1анзава, лагьана. Ада, поселокда эцигнавай са шумуд к1валериз килигайдалай кьулухъ, к1валерин иесийрихъ галаз рахайдалай кьулухъ, абурун меслятдалди вич Селиман къвалав атайди эхтилатна. Вичихъ к1валин проектни авай ч1ал ада Селимаз хабар гана.Селим, атай мугьмандин машинда акьахна чкадал фена, проектдихъ галаз таниш хьана. Ахпа и касдиз к1вал эцигун вичивай хивез къачуз жедайди, лагьана. Къиметрин патахъай рахана, кьве падни рази хьана, гъилер яна. Эхирдай и касди вичиз мад са т1алабун авайди малумарна: « Селим стха, зун маса шегьерда еке карчивилел машгъул кас я, завай гьар лагьайла иниз хквез, контрол ийиз жедач. Заз хуьре яшлу дидени ч1ехи вах авайди я. И к1валер за гьабур патал эцигзавайди я. Квез минет я, рик1ивай эгеч1а и к1валахдив ва жезмай кьван фад эцига! Пулдин патай за квез гуж гудач, вахт-вахтунда ви банкунин счетдиз рекье твада».К1вал эцигунив Селим, гьа вичиз хас тирвал, гьевесдивди эгеч1на. Ада, вичиз ихтибар авай уст1арарни акуна, югъ-йиф лугьун тавун к1валахна, са акьван яргъал ч1угун тавуна, к1вал эцигна. К1вал эцигдай вахтунин мензилда, Рабадан садра Махачкаладиз ахкъатна. Селиман к1валахдин еридиз ва йигинвилиз килигна, рази яз хъфена. Гила, к1вал эцигна бегьемна лагьай паям агакьай Рабадан, мад хтана. К1валерин вири патарихъай халис иеси хьиз килигай Рабаданаз ц1ийи к1валер аяр акурди Селима кьат1ана. Ада Селимаз вичин машиндаваз фена, шегьерда авай са ресторанда ацукьна, нисинин фу т1уьн теклифна. Фу т1уьрдалай кьулухъ кьведани к1вал эцигай пулдин гьисабар хъувуна. Якъин хьайивал, арадал аламайди Селиман к1валахдин гьакъидин эхтилат тир. Рабадана гъил жибинда туна кисе акъудна, пул гьисабна, Селиман вилик столдал кьве гьакъидин пул эцигна. Селима вичин к1валахдин къимет кьве сеферда т1имил тирди рик1ел хкана. Рабадана вич гъавурда авай ч1ал чирна ва Селимаз и пул вичи ачух рик1елди теклифзавайди лагьана. Селима, мад сеферда вичин к1валахдин къимет т1имил тирди, вичиз дуьзвал к1аниди, вичин алакъа зегьмет галачиз атай пулдихъ авачирди, гъавурда тваз к1ан хьана. Амма и алахъунрикай хийир хьанач, Рабадан к1евиз акъвазна. Эхирни Селима «Рабадан т1вар алай касди ихьтин къадам къачун заз ажайиб к1валах жезва» лагьана зарафатдин жуьре хъуьрена, пул вичин жибинда туна. «Селим, - лагьана Рабаданни хъуьрена, а вуна - къенин йикъалди зун кьилихъ галачиз зи багърийриз ихьтин к1вал эцигна ч1угур зегьмет, и са шумуд вацра жуван гьакъидин т1вар кьун тавун - ибур к1усни т1имил ажайиб к1валахар туш! - жаваб гана Рабадана. Ахпани, к1вал къени хьайи кас, зи жибинда амай эхиримжи кепекар туш кьван, ваз гайибур!»
Селимни Рабадан ресторандай экъеч1на машиндиз акьах хъувуна. Хкведай рекье, шегьердин банкунин патавай фидайла, Селима машин акъвазарун т1алабна. Ам машиндай эвич1айла, Рабаданни адахъ галаз эвич1на. И кьве кас гъилер яна, чара хъхьана. Селима банк галайвал гьерекатна, Рабадан машиндин рулдихъ ацукь хъувуна, явашдиз гьал хъувуна. «Якъин пул к1вале хуьз к1анзавач жеди. Дуьз к1валах я, банкдихъ, гьикьван хьайит1ани, к1валелай гзаф ихтибар ава» - рекье фикирна Рабадана.
Селим банкунин рак1арай гьахьайла, ада жибиндай «ЛЕКИ» фондунин, балаяр галай лекьрен шикил ва «Халкь патал» кхьинар алай, гъвеч1и ч1аварган (календарь) акъудна. Ахпа ада, Рабадана гайи артухан пул, вичин са агъзур манатни винелай эцигна, ч1аварганни галаз кассадихъ акъвазнавай рушав вугана. Пул ч1аваргандаллай расчетный счетдиз вегьин т1алабна…
Примечание. ЛЕКИ - благотворительный фонд, основная деятельность которой осуществляется в ЮжДаге http://fondleki.ru/
