Къведрен муг

Мариф Кадимов -> Всем
Къведрен муг

   fab57274f455ca0f37de8c22349d8ae9.jpg   Гьажи гъвеч1и ч1авуз надинж аял тир. Гатун эхиррай са юкъуз ам бубади ам вичихъ галаз векьиз тухвана. Векь ягъизвай ник1ерикай садан къеряхдал къветрен муг алай, къведни какайрал ацукьнавай. Бубади адав кягъиз тунач, я вични пара мукьув эгеч1нач. Къведрен муг авай ник1ив агакьайла, бубади мукан кьудпата, яргъалай хьиз векь туна. «Ам серт къуш я, са сеферда кухуна хьуй, мад хкведайди туш!» - лагьана бубади. Са-кьве юкъуз Гьажи къветрез яргъалай килигиз хьана. Пуд лагьай юкъуз адавай давам гуз хьанач, буба алачир арада, ам, балаяр акъуднат1а килигиз явашдиз къветрен муказ мукьва хьана. Гьа и арада, къвед ц1ив кьилеллаз лув гана катна. Гьажи тядиз муказ килигиз фена. Ана авайбур какаяр тир, са балани авачир. Ада гьисабайла, ана гьеле чимивал кумай къанни вад кака авай. Гьа йикъара Гьажидин бубани векьер ягъиз маса, яргъа авай участокриз хъифена. Мад са пуд юкъуз Гьажи муг галай патахъ хъифенач. Амма кьуд лагьай юкъуз, ам, вичин дуст Керимни галаз, мад муказ килигиз атана. Мука къвед авачир, какаярни вири къанвай. «Аквар гьалдай къвед мад хкведай хьтинди туш»- лагьана Гьажиди. Ахпа абуру кьведани какаяр жибинра туна хуьруьз рекье гьат хъувуна. Хкведай рекье Гьажиди са кака Керимал гьалчна. Кериман майка хъипи хьана, Гьажидик хъвер акатна. Керима Гьажидиз жаваб хъувуна, кака адан пелел гьалчна. Адан пелелай авахьзавай хъипи рангар акурла, Гьажини руфун кьуна хъуьрез эгеч1на. Гьа ик1 рехъди и кьве ахмакьди кесиб къветрен вири какаяр тергна. К1вализ агакьдалди, хзанриз чир тавун патал, гадайри чпин беденарни майкаяр кама чуьхвена хтана...

      Бубади ягъай векьер къуру хьайила, к1ват1 хъийиз буба, диде, Гьажидин вах ва Гьажи вич фена. Ник1ин къеряхдал, векь тунвай чка акурла, бубадин рик1ел садлагьана къветрен муг хтана. Ада муг галай патахъ гьерекатна. Муг буш акурди, ам суал гузвайди хьиз Гьажидихъ элкъвена. Гьажиди кьил агъузна, чилиз килигна.

     Бубади виридаз ван къведайвал лагьана: «Са ни ят1ани вичел еке гунагьдин пар къачуна, къветрен к1вал чук1урна!»

     Вахтар, вядеяр арадай фена. Гьажи ч1ехи хьана, вичин к1вал-югъ хьана. Уьмуьрда хъсан, еке агалкьунар авай йикъарни хьана, к1еве гьат авур вахтарни. Ч1ехи яшарив агакьайла, ам еке, туьк1вей хзандин иеси, гьардаз вичин к1вал-югъ авай аялрин буба тир. Вахт тамам хьайила, аллагьди гьар инсандиз са багьна себебна и дуьньядилай рекье твазва. Ингье, чи Гьажи бубадини яшар кьудкъадалай алатайла, вичин уьмуьрдин эхиримжи йикъар коляскада аваз акъудна. Амма ажаиб ва аламат жедай к1валах ам я хьи, эхирдин лап к1еве авай йикъара адан рик1ел и чна винидихъ гъайи вакъиа хтана. Вичин чандиз гузвай азаб, вичи къветрез авур писвал себеб яз гузвайди я лагьана...

*
 
*